Keriçte Rusiye quvetçileri "İyegova şaatları" diniy teşkilâtınıñ azasını yaqaladı, dep bildire Qırım ve Aqyar boyunca Taqiqat komitetiniñ Rusiye idaresi.
Qayd etilgenine köre, Keriçniñ 53 yaşında sakini bu diniy teşkilâtnıñ rayon bölüginiñ toplaşuvlarını keçire ve evde Rusiyede yasaq etilgen edebiyatnı saqlay edi.
Tutulğan kişiniñ adı ve soyadı aydınlatılmay, onıñ bu vaziyetke dair açıq izaatları yoq. Şimdiki vaqıtta o, "yasaqlanğan diniy teşkilâtnıñ faaliyetini teşkil etüvde" qabaatlana. Bu maddeniñ cezası 10 yılğa qadar apis cezasını belgiley.
Avropa "İyegova şaatları" assotsiatsiyası bu yaqalanuv aqqında şimdilik izaat bermedi.
Evel Ukrayina Yuqarı Radasınıñ vekâletlisi Dmıtro Lubinets, Rusiye qırımlılarğa qarşı diniy sebeplerden 100-den ziyade cinaiy iş açqanını bildirgen edi.
"İyegova şaatları" Avropa assotsiatsiyasınıñ malümatına köre, soñki 7 yıl içinde Qırımda 30 din adamı diniy sebeplerden taqip etildi.
Rusiye Yuqarı mahkemesi 2017 senesi "Rusiyede İegova Şaatlarınıñ idare merkezi"ni ekstremist teşkilât olaraq tanıp, onıñ faaliyetini yasaq etti. Soñra Rusiyede şaatlarnıñ bütün uquqiy şahısları ekstremist ve yasaq etilgen şahıslar cedveline kirsetildi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
