Keriçte Rusiye quvetçileri Rusiye ordusınıñ itibarını tüşürgen ve içtimaiy ağlarda LGBT aqlarını qorçalağan kişige 150 biñ ruble para cezasını berdi. Bu aqta Ukrayina prezidentiniñ Qırım Muhtar Cumhuriyetindeki Temsilciliginiñ beyanatında aytıla.
Müessiseniñ yazğanına köre, söz Oleg Gubskiy aqqındadır.
"İşğalciler Keriç şeerinde Gubskiy Olegni tuttılar. O, içtimaiy ağlarda işğalci ordu ve memuriyetni tenqit ete edi. İşğalciler erkekni vaqtınca tutuv izolâtorına yolladılar, bundan soñ onı qanunsız şekilde "Rusiye Silâlı quvetleriniñ itibardan tüşürüvi" ve LGBT teşviqatında qabaatlı tanıp, 150 biñ ruble para cezasını berdi, dep aytıla haberde.
Keçken aftanıñ soñunda onıñ tutulması aqqında Qırımlı Rusiye tarafdarı bloger Aleksandr Talipov da haber etti.
Ukrayina prezidentiniñ Qırım Muhtar Cumhuriyetindeki temsilciligi, aprelniñ 11-nde ilhaq etilgen Qırımda Rusiye mahkemelerine Rusiye Silâlı quvetleriniñ "diskreditatsiyası" aqqında 737 malümat kelgenini bildirgen edi.
Ukrayina prezidentiniñ Qırım Muhtar Cumhuriyetindeki temsilciligi, Qırımdaki Rusiye mahkemeleri yerli sakinlerge Rusiye Silâlı quvetleriniñ itibarını tüşürgenleri içün 20 million rubleden ziyade para cezasını berdi, dep bildirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
