Tabiat afetinden zarar körgen Keriçte cemaat naqilâtı qatnap başladı. Bunı öz Facebook saifesinde Keriçniñ Rusiye memuriyetiniñ başı Sergey Borozdin haber etti.
«Cemaat naqliyatı tam şekilde yüre, şu cümleden Pirogova ve Samoylenko soqaqlarında da», – dep yazıla bildirmede.
İyünniñ 19-nda saba Qırım boyunca Rusiye Fevqulâde vaziyetler nazirliginiñ haber etkenine köre, Keriçte muvaqqat yerleşüv noqtalarında 148 adam buluna, olarnıñ arasında 32 bala. Qurtarıcılarnıñ malümatına köre, şeerdeki tufan neticesinde 110 adam zarar körgen.
Keriçte şiddetli yağmurlar neticesinde beş soqaq ve 230-dan ziyade ev ve daire suvğa battı. Şeerniñ merkezi ve 1-nci hastahane elektriksiz qaldı.
Suv basuvı yerine Qırımnıñ Rusiye başı Sergey Aksönov keldi, dep yaza Nastoyaşçeye Vremâ.
Keriçniñ Rusiye memuriyetiniñ başı Sergey Borozdin, suv taşqını sebebinden zarar körgenler Meridian musafirhanesine avuştırılğanını bildire.
Qırımnıñ FVN-niñ malümatına köre, 125 insan tahliye etilgen, olardan 28 bala. Böylece, Yedi Quyu rayonınıñ Priozernoye köyünde 40 adam tahliye etildi, olarnıñ arasında 10 bala, Novootradnoye qasabasında – 15 insan, olardan 5 bala, Keriçte ise 70, olardan 14 bala.
Qırımnıñ Gidrometeorologik merkeziyende haber etkenlerine köre, bu gece yarımadanıñ şarqiy rayonlarında yağanaqlarnıñ aman-aman eki aylıq qararı yağğan.
