Keriç yolbaşçısı vazifelerini vaqtınca eda etken Svâtoslav Brusakov Keriçniñ alçaq rayonlarında yaşağan sakinlerni tahliyege azır olmaq kerek, dep tenbiledi.
«Keriçniñ alçaq rayonlarında ve suv basa bilecek rayonlarda yaşağan eali küçlü yağanaqlar sebebinden evleri ve hocalıq inşaatlarını suv basmasını eksiltmek içün tedbir almalı, vesiqa ve ilk ihtiyac eşyalarını, ilâc, urba ve azıq mallarını azırlamalı. Tahliyege azır olmaq kerek», – dep bildire Brusakovnıñ aytqanlarını şeerniñ Rusiye memuriyetiniñ matbuat hızmeti.
Qırımnıñ Rusiye ükümetiniñ yolbaşçısı Yuriy Gotsanükniñ malümatına köre, Keriç, Kefe, Yedi Quyu ve İslâm Terek rayonları «eñ büyük telüke altında» buluna.
«Bu yerler regional seviyeli fevqulâde vaziyet alanına kirmekte», – dep qayd etti o.
Küçlü yağanaqlar yağğanı içün avgustnıñ 13-nde saba Keriçniñ merkeziy soqaqlarını suv bastı.
Daa evel berilgen malümatqa köre, Qırımnıñ şarqındaki Köp Kenegez (Krasnogorka) köyünde sağanaqlar neticesinde 170 azbarnı suv bastı.
Qırımdaki Rusiye Fevqulâde vaziyetler nazirliginiñ idaresi avgustnıñ 13-ne, 14-ne furtuna ihtarını ilân etti – yarımada şarqında ava bozulacaq, dep tahmin etile.
Qırımlı sinoptiklerniñ malümatına köre, şarqiy Qırımnıñ yaoısında avgustnıñ 13-nde eki metrlik dalğalar olacaq.
«Fobos» Rusiye ava merkeziniñ mütehassısı Yevgeniy Tişkovetsniñ bildirgenine köre, Qırımda sağanaqlar sebebinden «Nuh tufanı» beklenile.
