Keriçniñ 45 yaşındaki sakini içtimaiy ağdaki yazıda RF ordusını "itibardan tüşürgeninde" qabaatlanğan. Bunı Qırımdaki Rusiye İç işler nazirliginiñ idaresinde haber ettiler.
Polisniñ versiyasına köre, qadın bu seneniñ mayısınıñ 13-nden iyuniniñ 24-ne qadar populâr videohistingge atfı etip "itibardan tüşürgen malümat" yayınlağan.
Qadınğa qarşı RF Memuriy uquq bozmalar qanunnamesiniñ 20.3.3 maddesiniñ 1-nci qısmına binaen protokol tizilgen. Qararnı Rusiyeniñ nezareti altında olğan Keriçniñ şeer mahkemesi çıqaracaq. Onı 100 biñ ruble qadar para cezası bekley bile.
Qabaatlanğan qadınnıñ adı ve soyadı belli degil, bu vaziyetke dair izaatları da yoq.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
