Keriç (Qırım) köprüniñ yoq etilmesi ilhaq etilgen Qırımda Rusiye küçü aqqında mifni red etecek. Bu aqta Ukrayina prezidentiniñ Qırım Muhtar Cumhuriyetindeki daimiy temsilcisi Tamila Taşeva Yalta Avropa strategiyasınıñ mahsus körüşüvinde bildirdi.
''Şunı qayd etmek kerek ki, Ukrayinanıñ flotu olmasa da, bizim silâlı quvetlerimiz Qırım yarımadasına faal tesir ete, Keriç köprüne, arbiy bazalarğa ve Qırımdaki diger arbiy obyektlerge irişe bilemiz. Yerli ealiniñ böyle areketlerge musbet cevabı bar. Qırımdaki insanlarnıñ aytqanlarını diqqatnen taqip etemiz, ve hususan Rusiye tarafdarları ve Ukrayina tarafdarları arasında Keriç köprüni yıqacaq olsaq, yarımadada Rusiye küçü aqqında mifni red etecegini tasdıqlağan bazı gizli tedqiqatlar bar", - dedi Taşeva.
Ukrayina istihbaratınıñ başı Kırılo Budanov Qırımdaki Rusiye quvetleri içün "yañı sürprizler" aqqında ilân etti ve vatandaşlarğa Keriç köpründen faydalanmamağa tevsiye etti.
İşğal etilgen Qırımğa ücümler sıq-sıq ola, şu cümleden işğal etilgen yarımadanı Rusiye ile bağlağan Keriç köprüniñ yanında patlavlar aqqında haber etile. Rusiye akimiyeti patlavlarda Ukrayina ordusını qabaatlay ya da olarnı talimler dep adlandıra. Kıyiv tek bazı ücümlerde iştirak etkenini tasdıqlay.
Rusiye Keriç köprüniñ qurucılığını Qırım işğalinden soñ başladı. Avtomobil areketi 2018 senesi açıldı, demiryol areketi 2019 senesi açıldı. Şimdiki vaqıtta Rusiye bu köpürni Ukrayinağa qarşı cenkte iştirak etken ordularınıñ taqımını temin etmek içün qullana.
2022 senesi oktâbr ayında Qırım (Keriç) köpründe patlav yüz berdi. 2023 senesi iyülniñ 17-nde Keriç köpründe daa bir patlav oldı, neticede avtomobil yolları yıqıldı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
