Keriç köprüniñ kirişinde Rusiye Federatsiyası ve Qırım tarafından 1200 maşna nevbette tura, dep bildire Rusiye akimiyetiniñ nezaretindeki telegram-kanalı.
"Taman tarafından nevbette 870 naqliyat vastası tura. Beklev müddeti üç saatqa yaqın. Keriç tarafından nevbette 370 naqliyat maşnası tura. Beklev müddeti bir saattan çoq ola", — dep aytıla haberde.
Keriç köpründe gece saat 3:15 başlap saba saat 7:13 qadar uçaqlarnıñ ücüminden sebep yol areketi toqtatıldı. Avgustnıñ 16-nda gece Keriçte patlavlar eşitildi. "Krımskiy veter" telegram-kanalı yazğanına köre, şeerniñ Sovetskaya soqağında yıqılğan parçalar sebebinden trotuar zarar kördi, yol qısmen yıqıldı. Belki de, bağ bozulğan.
Rusiye Mudafaa nazirligi, Qara deñizde yoq etilgen beş ukrayin UAV ve eki deñiz dron ücüm etkenini bildirdi. Bu malümatnı tasdıqlamaq şimdilik imkânsız. Keriçniñ Rusiye akimiyeti vaziyetni izaatlamadı. Ukrayina tarafı da bu ücümler aqqında bir şey aytmadı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
