Avgustnıñ 5-ne keçken gecesi Ukrayina Telükesizlik hızmeti ve Ukrayina Arbiy deñiz quvetleri Keriç köprüne ücüm etti. Bunı NV neşri müessisedeki menbasına atfı etip bildire.
Onıñ sözlerine köre, ameliyat "alışılğan stsenariy boyunca" keçken. Ücüm içün üstünde 450 kilo trotil olğan suv üstü drondan faydalanılğan. Haber etilgeni kibi, bunıñ neticesinde tanker Keriç körfezinde suv tübüne kete.
Suv üstü dronlarınıñ Rusiye gemilerine ücümlerini Ukrayina Telükesizlik hızmetiniñ yolbaşçısı Vasıl Malük da izaatladı.
"Rusiye Federatsiyası gemileriniñ ya da Keriç köprüniñ başına kelgen er angi "pamuqlar" duşmanğa doğru tamamınen mantıqlı ve tesirli bir adımdır. Bundan ğayrı böyle ameliyatlar Ukrayina territorial suvlarında keçirile ve tamamınen qanuniydir", - dep bildirdi o.
Ukrayina quvet hızmetleri Rusiyege qarşı ve işğal altındaki Qırımda ücümlerni çoq izaatlamay. 2023 senesi mayıs ayında Ukrayina telükesizlik hızmetiniñ yolbaşçısı Vasıl Malük Ukrayina telükesizlik hızmeti işğal etilgen Qırımda Rusiye flotunıñ gemilerine deñiz dronlarınen ücüm etkenini aydınlattı.
Ukrayina Cenübi mudafaa quvetleriniñ birleşken koordinatsion matbuat merkeziniñ matbuat kâtibi Natalâ Ğumenük Azatlıq Radiosınıñ yayınında Novorossiysk yanında patlavlar Rusiyeniñ provokatsiyaları ola bile, dep tahmin etti.
Rusiye kütleviy haber vastaları Rusiye Mudafaa nazirliginiñ malümatına esaslanıp, avgustnıñ 4-nde saba Krasnodar ülkesinde, Novorossiysk rayonında, «Rusiye gemileri eki ukrayin ekipajsız katerniñ arbiy-deñiz bazasına qarşı yapqan ücümini keri qaytardı», dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
