Keriç köpründe mayıs bayramları yaqınlaşqanı ve kurort mevsimi başlağanı sebebinden nezaret kompleksleriniñ sayısı artacaq, dep bildirdi Qırımnıñ Rusiye yolbaşçısı Sergey Aksönov.
Onıñ aytqanına köre, şimdi köpürden keçmek içün beklev vaqtı bir saatqa yaqın ola.
"Amma, fevqulâde vaziyet olsa, misal olaraq, raketa ücüm telükesi olsa, areket vaqtınca sıñırlana bile", - dep bildirdi Aksönov.
Hatırlatamız, evel Rusiye memurı, telükesizlik sebeplerinden Qırımda mayıs 9 paradı ve "Ölümsiz polk" aktsiyası keçirilmeycek, dep bildirdi.
Keriç köprü ilhaq etilgen Qırımnı Rusiye ile bağlay. 2022 senesi oktâbr ayında Qırım (Keriç) köpründe patlav yüz berdi. 2023 senesi iyül 17-de Keriç köpründe daa bir patlav oldı. Rusiye akimiyeti patlavlarda Ukrayina ordusını qabaatlay ya da olarnı talimler dep adlandıra. Kıyiv tek bazı ücümlerde iştirak etkenini tasdıqlay.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
