Boşnıñ 19-na keçer gecesi işğal etilgen Qırımnıñ Keriç köprü rayonında patlavlar eşitildi. Rusiye kontrolindeki Qırım yolbaşçısı Sergey Aksönov köpürge daa bir ücüm yapılğanını tasdıqladı.
"Krımskiy veter" Telegram kanalınıñ malümatına köre, Keriçte gece saat birlerde küçlü patlav ve raketa sesleri eşitilgen. Başta abunecileri eñ azdan sekiz patlav olğanını bildirdiler, soñra bu sayı 15-16 dep tahmin etildi. Şaatlar patlavlarnıñ bazıları Rusiyeniñ avadan qorçalanuv sistemalarınen bağlı olğanını iddia eteler.
Bundan ğayrı, kanal abunecileri Keriç köprüniñ etrafında parlaq yaşnamalar, onıñ demiryol qısmına eki ücüm aqqında haber ettiler. Bu malümatnıñ tasdıqı daa yoq.
Rusiyeniñ nezaret etüv kanalları Keriç yarımadasında raketa telükesi olacağı aqqında haber etken ediler.
Soñra Qırımnıñ Rusiye yolbaşçısı Keriç köprüne yapılğan ücümni tasdıqladı.
"Qırım köprüne endirilgen daa bir ücüm neticesinde yol yürüşi vaqtınca qapatıldı. Bütün kerekli hızmetler qaza yerinde çalışmaqta. Zararnıñ mıqyası daa belli degil", — dep yazdı Aksönov.
Soñki bir qaç kün içinde bu Keriç köprüne endirilgen üçünci ücümdir.