Keriç sakinleri dekabrniñ 1-nde sabadan berli Arşintsevo rayonında eşitilgen atış sesleri sebebinden qasevetlene. Qırım.Aqiqat mühbiri bildirgenine köre, Partizanskiy qasabasınıñ sakinleri avtomat ve «ağır silâ ateşini» eşitti.
Yerli saifelerde keriçliler qasevetlengenini yazıp başlağan soñ «Kerç – moy gorod» saytı atış sesleri poligondan kele, «anda şeer çıqışındaki arbiy bölükte talimler keçirile», dep bildirdi.
Bundan evel «VKontakte» içtimaiy ağında arbiy bölükniñ tam yeri qayd etildi – Keriç çıqışından Aqmescit yolunıñ 9-ıncı kilometri, lâkin bir qaç daqqadan bunı silgenler.
9-ıncı kilometrde 2014 senesinden evel Ukrayınıñ 40-ıncı Qırım radiotehnik brigadasınıñ 262-nci ayrı radiotehnik batalyonı (A-0883) yerleşken arbiy bölük bar edi. İşğalden soñ arbiy bölük Rusiye arbiyleri tarafından zapt etildi.
Keriçniñ Rusiye memuriyeti şeerde ve civarlarında bir de bir talim aqqında bildirmegen edi.
Avgust ayından berli Qırım ve Aqyarda aman-aman er kün patlav sesleri eşitile. Rusiye akimiyeti «Ukrayına uçucısızlarına» atış ve «ava mudafaa sistemalarınıñ işi» aqqında ayta.
Noyabrniñ 18-nde Qırımnıñ Rusiye yolbaşçısı Sergey Aksenov yarımadada onıñ kontroli altında fortifikatsion inşaatlar qurula, dep tasdıqladı.
Noyabrniñ 22-nde Rusiye kontrolindeki Qırım akimiyeti içtimaiy ağlarda yerli sakinlerniñ Ermeni Bazardan tahliye etilgenine dair «sahte haberler» tarqatıla, dep bildirdi.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
