Avgustnıñ 3-ne keçer gecesi işğal etilgen Qırımnıñ çeşit regionlarında patlavlar oldı, dronlar uçtı, Rusiye mobil ateş gruppaları çalıştı, Keriçte yanğınlar çıqtı, Kerçi (Qırım) köpründe areket qapatıldı. Bu aqta yerli monitoring kanalları yaza.
Patlavlar Aqmeçit qasabası, Kezlev, Saq rayonı, Kefe, Aqmescit, Kerçi (Mitridat dağı civarında) eşitildi.
Ukrayinağa qoltutqan "Krımskiy veter" Telegram kanalı Keriçniñ Merkeziy bazarında urulğan dron parçaları tüşti, dep bildire.
"Krımskiy veter" "Keriçte daa bir yanğın Keriç köprüniñ qurucılarnıñ vaqtınca qasabası yanında qayd etildi", dep yaza.
Yanğın sebebinden Keriç merkezindeki evlerniñ bir qısmı elektrik energiyasız qala, der bildire "MıKerç.RF – novosti Krıma" yerli Telegram kanalı.
Keriç köpründe naqliyat areketi eki saatqa qapatıldı.
Rusiye Mudafaa nazirligi saba gece 10 Rusiye regionı, işğal etilgen Qırım ve Qara deñizde 131 ukrayin uçucısızı yoq etildi, dep bildirdi.
Ukrayina arbiyleri darbelerni şimdilik izaatlamadı.
İyün ve iyül aylarında Qırımdaki arbiy ve energetika obyektleri, Rusiye logistik yolları Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".