Keriçte Rusiye uquq qoruyıcıları Rusiye Federatsiyasınıñ askerlerini öldürmege çağırğan dep yerli sakinni tutqanlar. Bu aqta Rusiye tarafdarı bloger Aleksandr Talipov Telegram kanalında bildirdi. Bu malümatnı Rusiye FSB matbuat hızmeti tasdıqladı.
«Rusiye Federatsiyası Silâlı quvetleriniñ askerlerini açıq ve halq ögünde öldürmege çağırdı, bunı em içtimaiy ağlarda, em cemaat toplaşqan yerlerde laf sırasında yapqan edi», – dep aytıla Talipovnıñ haberinde.
Onıñ malümatına köre, adam Keriç bazarlarından birinde ticaretnen oğraşa, kira añlaşması bozulğan ve Rusiye Federatsiyası Ceza kodeksiniñ 280-inci maddesiniñ 2-nci qısmına istinaden (ekstremist faaliyetine çağıruv) tahqiqat başlatıldı. Onı beş yılğa qadar azatlıqtan marum eteler.
Erkekniñ adı ve soyadı aytılmay. Açıq izaatları yoq.
Rusiyede ve işğali altındaki topraqlarda Ukrayına tarafdarları taqip etile. Rusiyege qoltutqan bloger Aleksandr Talipov Telegram kanalında Ukrayına tarafdarlarınıñ şahsiy malümatını derc ete. Onıñ şikâyetleri esasında qırımlılar Rusiye ordusını «itibardan tüşürgeninde» qabaatlanıp, memuriy ve cinaiy mesüliyetke çekile. Ukrayına prokuraturası Talipovğa qarşı «milletlerara nefret doğuruv» maddesine istinaden cinaiy tahqiqat başlattı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
