İşğal etilgen Qırımda gece ava telükeleri aqqında haber etilgen soñ Keriç civarında kiçik vatandaş aviatsiyası uçaq alanında yanğınlar qayd etildi. Bu aqta yerli ve monitoring saifeleri bildire.
"Krımskiy veter" Telegram kanalı bildirgenine köre, yanğınlar uçaq alanında qayd etildi.
"Gece abuneciler Keriçte dronlar uçqanını ve patlavlar olğanını bildirdi. Uçaq alanında Rusiye arbiyleri "Pantsir-S1" zenit-raketa kompleksi ve radiolokatsion stantsiyalarnı yerleştirdi", – dep aytıla haberde.
Bunı Exilenova+ kanalı da tasdıqlay.
"Yerli sakinler kene şeerge ücüm etildi, dep haber ete. NASA FIRMS hızmeti ava mudafaasınıñ vastaları (Pantsir S-1) yerinde ve uçaq alanında yanğın olğanını qayd ete. Resmiy malümatnı ve Baş ştab esabatını bekleymiz", – dep bildirildi.
Rusiye Mudafaa nazirligi bu malümatnı resmiy şekilde izaatlamadı. Ukrayina Silâlı quvetleriniñ Baş ştabı da ücümnen bağlı bir malümat aydınlatmadı. Qırım.Aqiqat cenk vaziyetinde bu malümatnı teşkerip olamay.