Bugün gece işğal etilgen Qırım ve Aqyarda patlavlar eşitildi, dronlar uçtı, mobil ateş gruppaları çalıştı. Bu aqta yerli monitoring kanalları haber ete.
Küçlü patlavlar Keriçte oldı, şeerde ava telükesi ilân etildi.
Keriç köpründe areket gece eki kere qapatıldı.
Aqyarda Korabelnaya körfezinde ateş eşitildi. Aqyarnıñ Rusiye akimiyeti ava telükesini ilân etti.
Rusiye Mudafaa nazirligi saba bildirgenine köre, gece devamında 16 Rusiye regionı, işğal etilgen Qırım ve Azaq ve Qara deñizleri üzerinde 475 ukrayin uçucısızı yoq etildi.
Ukrayina arbiyleri darbelerni şimdilik izaatlamadı.
İyün başından arbiy ve energetika obyektleri, Qırımdaki Rusiye logistik yolları büyük cenk vaqtında Ukrayina Silâlı quvetleriniñ eñ büyük ücümlerine oğray. Er kün yañı nişanlarğa darbeler aqqında haber etile, Qırımda yaqarlıq qıtlığı sebebinden adiy insanlarğa benzin satılmay, elektrik energiyası cedvelge köre berile, Keriç köpründe ise nevbetler bar. Bala şifahane müessiseleri ve lagerleri sentâbr ayına qadar raatlanğanlarnı qabul etmey.
Ukrayina Mudafaa naziri Mıhaylo Fedorov darbelerniñ maqsadını añlattı – "Qırım dronlarnen izolâtsiya etile". Onıñ aytqanına köre, bu "rusiyeliler içün pek beklenilmegen aqibetlerge yol aça bile".