Keriçniñ Yedi Quyu rayonında Rusiye gvardiyasınıñ talimleri olacaq, dep haber ete Rusiye kontrolindeki şeer memuriyeti.
Talimler aprelniñ 11-nden 13-ne qadar devam etecek. Rusiye gvardiyasınıñ askerleri qurşunsız atış ve patlayıcı paketlerni qullanıp talimler keçirecek. Keriçniñ Rusiye akimiyeti sakinlerni raat olıp, telâşlanmamağa çağıra.
Aprelniñ 5-nde Rusiye kontrolindeki Kezlev yolbaşçısı Yelena Demidova şeerde Rusiye quvetçileriniñ talimleri keçirile, dep bildirdi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayına uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksenov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Yarımadada yüksek (sarı) terror telükesi bar. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
