Rusiye akimiyeti fevralniñ 23-nde Keriç (Qırım) köpründe areketni endi üç kere qapattı. Bu aqta Rusiye kütleviy haber vastaları ve Telegramdaki monitoring kanalları haber ete.
Sıñırlavlar Moskva saatınen yarı gecede 41 daqqağa ve gece birden soñ beş saattan ziyade oldı. Köpür kirişlerinde monitoring yapqan malümat merkezi haber etkenine köre, saat 06:47-de ve 11:04-te de areket toqtatılğan edi. Köpür qapalı olğanda bir qaç tren keç qaldı.
Soñki malümatqa köre, Taman tarafından 230 naqliyat vastası teşkerüv içün bekley. Keriç tarafında 240 naqliyat vastası baqılmasını bekley. Eki taraftan da beklev vaqtı tahminen bir saat ola.
Şimaliy-Kavkaz demiryolunıñ matbuat hızmeti haber etkenine köre, Qırımdan Rostov üzerinden ketken bir qaç tren cedvelge köre keç qala.
Qayd etilgenine köre, sebep – Ukrayina Silâlı quvetleriniñ gece ücümi sebebinden köpürde areket qapatıluvıdır. Laf "Tavriya" şirketine ait üç tren aqqında kete. Olar 2,5-3,5 saat keç qalıp, Rostovğa keleler.
Ukrayina Silâlı quvetleri Keriç köprüne ücüm malümatını tasdıqlamadı.