Qırımda Rusiye akimiyeti Keriç köprüni qapattı, dep bildirdi, monitoring telegram kanalları dron darbeleri telükesi aqqında yaza.
Areket toqtatılğanına dair haber Rusiye akimiyeti açqan telegram kanalı tarafından saat 17:42-de berildi. Böyle qararnıñ sebebi aydınlatılmadı.
Bunıñnen beraber, Rusiye monitoring kanalları Keriç yarımadası civarında, hususan Keriçte, Kefe, Taman ve qomşu Rusiyeniñ Krasnodar ülkesinde uçucısız telükesi aqqında eki kere yazdı. Bu malümatnı mustaqil menbalar vastasınen cenk vaziyetinde tasdıqlamaq zor.
Rusiye arbiyleri vaziyetni resmiy olaraq izaatlamay. Saat 16:31-de Aqyar şeer yolbaşçısı Mihail Razvojayev ava telükesi aqqında haber etti. Telüke tahminen 16 daqqa devam etti.
Kündüz Qırımnıñ telegram kanalları Keriçte, Qurman ve Canköy rayonlarında Rusiye Federatsiyası ava mudafaasınıñ iş sesleri aqqında bildirgen edi. Rusiye Mudafaa nazirligi Qırımda saat 8:00-den 13:00-ke qadar tüşürilgen 10 dron aqqında esabat berdi. Tüşürilmegen uçucısızlarnıñ sayısı aytılmay.
2022 senesinden berli Qırım yarımadası aman-aman er kün uçucısız ve raketalarnıñ ücümlerine oğray, çoqusı allarda bu malümat tasdıqlansa bile, Rusiye Mudafaa nazirligi ya da Rusiye akimiyeti arbiy obyektlerge darbe endirilgenini inkâr ete.
