Keçken aftanıñ soñunda Ukrayına ordusı işğal etilgen Qırımda Rusiyeniñ «Avangard» ve «Konro Treyder» paromlarına ücüm etti. Neşirniñ qayd etkenine köre, Rusiye menbaları darbeler içün ğarbiy silâ qullanıldı, dep bildirdi – ATACMS ve Storm Shadow raketaları. Qırımdaki Rusiye ava mudafaa sisteması kene bozuldı.
Paromlardan eñ az biri battı, ekincisiniñ korpusında balaban teşik peyda oldı, amma batmadı. Bildniñ arbiy közeticisi Yulian Repke qayd etkenine köre, eki parom yıllar devamında Rusiye ve işğal altındaki yarımada arasında yüre.
«2018 senesi oktâbr ayında Keriç köprüniñ açılışınen paromlar emiyetini coydı, çünki Rusiye yüklerini Qırımğa demiryoldan taşıy edi. Lâkin 2022 senesi oktâbr ayında er şey deñişti, küçlü bir patlav Keriç köprüniñ demiryol qısmına bayağı zarar ketirip, onı bir qaç aftağa çalışmaycaq alğa ketirdi. Qırımnıñ «Avangard» ve «Konro Treyder» paromları yarımadanı vatandaş ve arbiy yüklernen teminlemek içün kene müim oldı», – dep qayd ete Bild.
Bazı közeticilerniñ fikirince, paromlarğa qarşı darbe Keriç köprüne qarşı yañı ücümniñ alâmeti ola bile. Bu versiyağa köre, Ukrayınanıñ maqsadı Rusiyeni Keriç boğazında demiryolniñ yerine paromlarnı qullanuv imkânından marum etmektir.
Ukrayına arbiyleri Keriç köprüne ne vaqıt ve nasıl ücüm etecek belli degil.
2022 senesi oktâbr ayında Keriç köpründe patlav oldı. Daa bir patlav Keriç köpründe 2023 senesi iyülniñ 17-nde oldı. Rusiye akimiyeti Ukrayına akimiyeti ve Ukrayına mahsus hızmetlerini qabaatlay. Kyiv resmiy şekilde tek bazı ücümlerge alâqası bar olğanını tasdıqlay.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
