Rusiyeliler Keriç (Qırım) köprü boyu parallel köpürge oşağan qoşma bünyeler qura. Bu aqta «Krımskiy veter» Telegram kanalı fotoresim derc etip bildire.
Bu bünyelerniñ vazifesi belli degil. «Militarnıy» Ukrayina portalı yañı inşatlar Keriç köprüni Ukrayina ücümlerinden qorumaq içün qullanıla bile, dep tahmin ete. Qırımdaki Rusiye akimiyeti bunı daa izaatlamadı.
Keriç köprü Rusiye tarafından işğal etilgen Qırımğa esas yol ola ve Qırım yarımadasına arbiy taşuvlar içün qullanıla.
Qırım.Aqiqat mühbiri bildirgenine köre, Keriçte Keriç köprü yanında pekitüv işleri qayd etildi. Bu malümatnı Amerika kirişim institutınıñ tış ve mudafaa siyasetini tedqiqatlar bölüginiñ talilcisi Bredi Afrik tasdıqlağan edi.
Jurnalist tedqiqatları merkeziniñ malümatına köre, Rusiye mayısnıñ 7-nde Keriç köprüniñ suvustü qoruvını qurıp başladı ve devam ete. Ücümlerden qorumaq içün qora yapıla.
İyünniñ soñunda berilgen malümatqa köre, Rusiye quvetleri Keriç köprü yanında 21 barjadan qoralar qoya ve bir qaç aydan berli, büyük ihtimalnen, pirsler yapa.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
