Keriç köpründe areket bazarertesi aqşamı toqtatıldı. Operativ malümat Telegram kanalında aytılğanına köre, köpür Kyiv saatınen 23:35-te qapatıldı.
Rusiye saifeleri yazğanına köre, gece Qırım raketa ve uçucısızlarnıñ ücümine oğradı – nişanlardan biri Keriç köprü olğan eken. Rusiye Federatsiyasınıñ Mudafaası bildirgenine köre, yarımadağa 38 uçucısız ücüm etti, olarnı ava mudafaa sisteması yoq etti.
Telegram kanalları darbe neticesinde 22160 leyhasınıñ «Sergey Kotov» Rusiye patrul gemisi batırıldı, dep yaza. Anda olğan insanlarnıñ alı daa belli degil.
Muarririyet bu malümatnı teşkerip tasdıqlap olamay. Rusiye akimiyeti gemi batqanını izaatlamadı.
22160 leyhası – patrul gemileri. Rusiyede suvda dört dane bar –«Vasiliy Bıkov», «Dmitriy Rogaçev», «Pavel Derjavin» ve «Sergey Kotov». Soñkisi iyul ayında, soñra ise bıltır sentâbr ayında zarar kördi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
