Keriçten Moskvağa ketirilgen dört genç qız «ağır alda buluna», dep bildire oktâbrniñ 22-nde Moskvanıñ acele bala hirurgiyası ve travmatologiyasınıñ ilmiy-tedqiqat institutına esaslanıp «İnterfaks».
Bazarertesi saba berilgen malümatqa köre, İlmiy-tedqiqat institutında Keriç faciasından soñ Moskvağa ketirilgen sekiz yaralanğan kişi buluna. Olardan dört qızçıq «ağır alda buluna, aqcigerlerniñ suniy avalandırma cihazlarına bağlı».
Daa üç yaralınıñ alı ağır, birisi orta ağır alda buluna. İlmiy-tedqiqat institutına ketirilgen genç qızlarnıñ yaşı 14-ten 20-ge qadar.
Qırımnıñ Rusiye sağlıq nazirligi bildirdi ki, Keriç faciasından soñ yaralanğan 25 insan Moskva ve Krasnodar tibbiy müessiselerinde buluna. Rusiye memurları alları aqqında bir şey aytmadı.
Patlav ve atışuv çarşenbe künü, oktâbrniñ 17-nde, Keriç politehnik köllecinde oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Şeerniñ Rusiye akimiyeti, facia neticesinde 21 insan elâk oldı, dep bildirdi.
Keriçteki patlavdan soñ Qırımnıñ Rusiye yolbaşçısı Sergey Aksenov Qırımda üç künlik matem ilân etken edi.
Keriç ve Aqmescit tibbiy müessiselerinde Keriç politehnik köllecinde olğan patlavda yaralanğan 25 insan tedavi köre. Daa 25 insan Qırımnıñ hastahanelerinden Krasnodar ülkesi ve Moskva tibbiy müessiselerine alındı.
Oktâbrniñ 19-nda elâk olğanlar Keriçte ve Yedi Quyu rayonında defin etildi. Keriçteki politehnik köllecinde kütleviy öldürüv qurbanlarınen vedalaşmaq içün biñlernen insan keldi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
