Yük maşinası Keriçteki qızdıruv hattını bozdı, çarşenbe sabası 22 biñ müşteri qızdıruvsız qala, dep bildire şeerniñ Rusiye yolbaşçısı Sergey Borozdin.
«Bugün gece Keriç boğazındaki demiryol köpürniñ qurucılığında çalışqan «SMU 84» şirketiniñ samosvalı Kefe yolunda kuzovnı köterip kete edi, neticede 800 mm diametrli eki borunı bozıp, olarnı leyha çizgisinden köçürdi», – dep bildirdi Borozdin Facebookta.
Onıñ malümatına köre, Keriçteki qaza neticesinde 55 çoq qatlı ev – 22 biñ müşteri – Marat rayonınıñ sakinleri, №23, 24 mektepleri, 2 bala bağçası ve koloniya qızdıruvsız qaldı.
Borozdinniñ bildirgenine köre, «ealige qızdıruv berilmesi toqtatılğan edi, qaza aqibetlerini mümkün olğanı qadar tez yeñmege tırışacaqlar».
Yerli akimiyet oktâbr ayınıñ soñunda Keriçte qızdıruv mevsimi başlağanını ilân etken edi. Bundan soñ kütleviy haber vastaları Keriçniñ bazı rayonları alâ daa qızdırılmay, dep bildirgen edi.
Noyabrniñ 12-nde Keriçniñ Rusiye memuriyeti qızdırılmağan evlerniñ sakinlerini bu zorluqlarğa «sabırlı dayanmağa» çağırdı.
