Keriçte fevralniñ 12-nde keçken ay qullanılmağa başlağan sürgün etilgen vatandaşlar içün yañı evniñ fasadı qısmen tüşti. Bu aqta Qırım kütleviy haber vastaları bildire.
«Kerç.FM» yazğanına köre, qızdırıcı yañı evniñ birden üç qatından tüşti, parçalarını yel yaqındaki yer ve çeçeklikke tarqattı.
Bu malümatnı Rusiye kontrolindeki Keriç memuriyetiniñ yolbaşçısı Sergey Borozdin tasdıqlay.
«E, fasad tüşti. Ev qurucılığını sımarlağan şirketke haber ettik, nazir (qurucılıq ve mimarcılıq) Hramov Mihail Mihayloviçke malümat berdik, qurucığa iddiada bulundıq. İlk evelâ sebebini ögrenmeli, ve elbette, evniñ fasadını ğayrıdan tiklemeli», – dedi Borozdin «Krıminform» neşirine.
Onıñ bildirgenine köre, iş yapqan şirket cezalandırılacaq.
«Şeer sımarış etti. Eminim ki, sımarış etkenler iddialarını bildirecek. Yerine ketirilecek kefalet mecburiyetleri bar. Ceza sanktsiyaları kirsetilecek, dep tüşünem», – dep bildirdi Borozdin.
Çarşenbe künü, fevralniñ 12-nde, Keriçniñ Yeremenko soqağında insanğa terek tüşti, bunıñ neticesinde o, can berdi. Qaza yerine kelgen ekimler ölgenini ayttı.
Kefede yel mesken evge ve yolğan tüşken damnı qoparıp aldı.
Fevralniñ 12-nde saba yarımay ava Aqyardaki parom keçitiniñ işini toqtattı.
Fevralniñ 11-nde Kefe civarındaki Primorskiy qasabasında furtuna oldı. Deñiz dalğanları yolğa yetti, onı suv bastı.
Daa evel bildirgenine köre, fevralniñ 11-12-nde Qırımda ava bozulacaq: küçlü yağmur, sılaq qar yağacaq ve saniyede 25 metr süratlı furtuna yeli esecek.
Qırımdaki Rusiye Fevqulâde vaziyetler nazirliginiñ idaresi yarımadada furtuna havfını ilân etti.
