Keriçte mayısnıñ 1-nde olğan numayış terrorizm ile küreş telükesizliginiñ tedbirleri ile keçirildi. Qırım.Aqiqat mühbiriniñ bildirgenine köre, bu sene ilk sefer Karl Marks soqağındaki mesken evlerniñ azbar çıqışlarında Rusiye politsiyasınıñ hadimleri maden qıdırıcı ile turıp, azbarlardan çıqqan bütün yerli sakinlerni teşkere edi.
Qırım.Aqiqat mühbiri öz azbarından çıqqan balalı qadınnıñ teşkerüvge bergen sert cevabını kördi.
Karl Marks soqağına ketken er kes, şu cümleden numayışçılarnıñ kolonnaları, maden qıdırıcılardan keçken edi.
Naqliyatnıñ büyük qısmı keçken şeer merkezi qapatıldı. Karl Marks soqağında kolonnalar tizilgen yerge yaqın bütün soqaq ve aralıqlar beton bloklarınen ve qoralarnen qapatıldı.
Qırım.Aqiqat mühbiriniñ bildirgenine köre, numayışçılar kolonnası Lenin meydanına yol alğanda Rusiye politsiyasınıñ hadimleri onı yan taraflardan ve arqadan taqip ete edi.
Rusiyeniñ Qırım işğalinden soñ Keriçteki kütleviy şeer tedbirleri quvetleştirilgen telükesizlik tedbirlerinen keçirile. Bayramlar keçirilgen yerni qazaqlar, Rusiye politsiyası ve Rusiye gvardiyasınıñ hadimleri közete.
Aqmescitniñ Rusiye memuriyeti «Monstratsiya» art-performansınıñ iştirakçilerine mayısnıñ 1-nde yürüş keçirmesini yasaqlağan edi.
