Qarasuvbazarda dekabrniñ 22-sinde keçken matbuat konferentsiyasında "Skazka" Yalta ayvanat bağçasınıñ ve "Taygan" arslanlar parkınıñ saibi Oleg Zubkov, Keriçte Qırımnıñ rusiyeli başı Sergey Aksönovnıñ buyruğınen içtimaiy naqliyattan "Taygan" parkınıñ reklamsını alıp taşlağanlarını aytıp berdi. Bunı Qırım.Aqiqat mühbiri bildire.
"Men, Rusiye qanunlarına köre reklama içün aqımdaki yılnıñ soñunace töledim, amma Aksönov şahsen yerli naqliyat şirketine telefon etip, reklamanı birden alıp taşlamağa talap etti. Qırımnıñ başına, böyle sebep ile şahsen telefon etmek içün ne qadar aşalanmaq kerek ki", - dedi Zubkov.
İş adamı, bu buyruq Rusiye prezidenti Vladimir Putinniñ Keriçke demiryol alâqasınıñ açılışına kelmesinen bağlıdır, dep saya.
Noyabrniñ 14-nde Zubkov, mahkeme park işini toqtatsa, 30 ayuvnı öldürmege mecbur olacaq, dep bildirdi. Qırımnıñ rusiyeli Tabiat Nazirligi, Zubkovnıñ ayuvlarnıñ ihtimallı "atuvı ya da evtanaziyası" aqqında aytqanı içün, qanun bozmasında saqındırdı.
Kreml kontrolindeki Yalta mahkemesi noyabrniñ 21-nde Oleg Zubkovdan ayvanlarnı musadere etüv davasını baqmağa başladı.
2014 senesi Rusiyeniñ yarımada ilhaqına qoltutqan qırımlı iş adamı Oleg Zubkovnıñ Qırımnıñ Rusiye akimiyetinen zıddiyeti bar. Oleg Zubkov, mal-mülki bulunğan topraq damartılarınıñ vesiqalarını beş yıldan berli resmiyleştirip olamay, dep bildire.
Qırım işğali devamında Zubkov Kreml kontrolindeki Qırım akimiyeti tarafından oña nisbeten para cezaları ve qabaatlavlarnen bağlı tahminen 500 mahkeme oturışuvına bardı.
