Keriç politehnik kollecinde oktâbrniñ 17-nde belli olmağan bir patlayıcı patladı, dep bildire Terrorizmge qarşı milliy komitet.
«Keriçte belli olmağan patlayıcı patladı», – dep tekrarlay komitetniñ malümatını «İnterfaks».
Terrorizmge qarşı komitet, ilk malümatqa köre, 10 insan elâk oldı, 50-ge yaqın yaralı bar, dep bildire. Yaralanğanlar şeerniñ tibbiy müessiselerine alına.
Keriç sakinleri Voykov soqağındaki politehnik kollecinde patlav olğanını bildirgen edi. Patlav sebepleri ve yaralanğanlarnıñ sayısı aqqında resmiy bir malümat yoq. Keriç kütleviy haber vastaları kollecdeki patlav yeriniñ fotoresimlerini aydınlattı.
Rusiye kütleviy haber vastaları 10-ğa yaqın insan politehnik kollecinde yüz bergen patlav neticesinde elâk oldı, dep yaza. Daa 50 kişi yaralandı. Qırımdaki Rusiye Fevqulâde vaziyetler hızmetiniñ idaresi elâk olğan ve yaralanğanlarnıñ sayısını aydınlatmay.
Qırımnıñ Rusiye yolbaşçısı Sergey Aksenov Keriç politehnik kollecine yol alğanını bildirdi.
