Keriçniñ merkezinde cuma künü, noyabrniñ 30-nda, Kokorin soqağındaki anbar binaları yanmağa başladı. Yerli kütleviy haber vastalarınıñ malümatına köre, politsiya adise yerini sarıp aldı, yanğınnı söndürmege tırışalar.
Qırım.Aqiqat tafsilâtlı malümat almağa tırışa.
«Kerç FM» saytı bildirgenine köre, şeer merkezinde tuman sırıq kibi köterile. Yanğan bina yanındaki «Novaya ploşçad» qurucılıq tükânına insanlarnı kirsetmeyler.
Yol inspektsiyası Vokzalnoye şossesini naqliyatnıñ keçişi içün qapattı, dep bildire «Kerç – moy gorod» saytı.
Qırımdaki Rusiye Fevqulâde vaziyetler nazirliginiñ idaresi Keriçteki yanğınnı daa izaatlamadı.
Bundan evel Bağçasaray rayonınıñ Bazarçıq (Poçtovoye) qasabasında meskün ev yanğan edi. Qurtarıcılarnıñ malümatına köre, noyabrniñ 24-nde yanğından 22 insan qurtarıldı.
