İşğal etilgen Keriçte martnıñ 9-nda ukrain şairi, ressamı Taras Şevçenkonıñ doğğan kününden 205 yıl keçkeni munasebetinen hatıra tedbirleri keçirilecek.
«Keriç şeeriniñ ukrain cemiyeti martnıñ 9-nda saat 10.00-da Taras Şevçenko skverine çeçek ketirip, meşur ukrain erbabını añmağa davet ete», – dep aytıla Keriçniñ Rusiye memuriyeti ilânında.
Bir yıl evelsi de Keriçte Taras Şevçenkonıñ doğğan künü ukrain şairiniñ abidesine çeçek desteleriniñ qoyulmasınen qayd etilgen edi.
Taras Şevçenko 1814 senesi martnıñ 9-nda dünyağa kelip, edebiyat ve ressamlıq icadı sayesinde meşur oldı. O, ukrain medeniyetiniñ eñ büyük timsallerinden biri ola.
