Bazarertesi künü, aprelniñ 22-sinde Keriçniñ merkeziy rayonı yarıqsız qaldı. Qırım.Aqiqat mühbiri bildirgeni kibi, yarıqnı saat 10.15-te söndürdiler.
Elektrik energiyası yoq olğanından sebep Keriç merkezinde üçfenerler çalışmay ve yollar maşnalarnen tıqalıp qaldı.
Bir kün evel energetikler söndürüvler içün haber etmegen edi. Keriçniñ rusiyeli memuriyeti bu aqta açıq tefsir bermey.
Qırım.Aqiqat tafsilâtnı bilmege tırışa.
2016 senesi baarde rus energoköprüniñ üçünci pıtağı işini başlağanına baqmadan, Qırımda yarıq söndürmeleri devam etmekte. 2015 senesi dekabrden başlap Herson vilâyetinde energetik tiremelerniñ bozulğanından soñ, Ukrainadan Qırımğa elektroenergiya berilmey. Şimdilik Qırım öz generatorları, Rusiye generatorları ve Kuban energoköprüniñ elektrik ağını qullana.
