Keriçte yanvarniñ 14-ünde aqşamğa qadar tamir işleri sebebinden suv olmaycaq. Bunı "Voda Krıma" müessisesi haber ete.
Bu malümatqa köre, aqşam saat 17-ge qadar Rıbakova, 1 Eksplanadnaya, Turçinskogo, Çelova, 23 Maya, Krupskaya, Kavkazskaya, Deukalo, Tsibizova, İndustrialnoye şosse, Voroşılova ve Budennogo soqaqlarında suvnı qapattılar.
Daa evel bildirile edi ki, Aqmescitniñ bir qaç rayonında tamir işleri sebebinden bir künge suv qapatılacaq.
Qırımda suvnı sıq-sıq qapatar. Bu, ağlarnıñ ipranğanınen ve suv ve çirkef borularınıñ yarılğanınen bağlı.
Ukraina Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminley edi. 2014 senesi Rusiye Qırımnı işğal etken soñ, yarımadağa suv berilmesi toqtatıldı.
