Keriçlilerni Rusiye bayrağı tüsteki şeritçiklerge bağlaylar

İşğal etilgen Keriçte Rusiye kününe bağışlanğan tantanalı tedbirler devam emtekte. Bugün şeerniñ merkeziy meydanında kelip keçkenlerge Rusiye bayrağı tüsteki şeritlerni bağışlay ediler.

Bunı «Keriçniñ yaşlar icra komiteti» adlı teşkilâtı azırladı. Teşkilâtqa çeşit oquv yurtlarnıñ studentleri kire.

Qırım.Aqiqat mühbiriniñ sözlerine köre, bedava şeritçikni almağa istegen bayağı adam bar edi.

Rusiye bayrağı tüsteki şeritler yarımadanıñ işğalinden soñ mot oldı. Olarnı çantalarda, saçlarda, ellerinde taşıylar, maşna, ayaqmaşnalarğa, atta köpeklerniñ boyun qayışlarına bağlaylar.

Rusiye künü munasebeti ile tedbirler Keriçte iyün 12 künü başlandı ve bazar kününece devam etecek. Er kün şeer merkezinde «Eski azbar» meydançıqta kontsertlerniñ keçirilmesi planlaştırıla.


Qırımda esas tedbirler iyün 12 künü keçti. Keriçte Rusiye timsalleri ile ayaqmaşna ve avtoyürüşler olıp keçti. Şeerni rus samovarı, balalayka ile «yaraştırdılar».

Aqmescitte Rusiye bayramı ile tatar «Sabantuy»ı qayd etile edi. Aqşam ise şeerliler bir-birini basıp, Nadejda Kadışevanıñ ve «Zolotoye koltso» taqımınıñ çıqışını körmege areket ete edi.