Keriçte «Z» timsalli Rusiye arbiy tehnikasınıñ kolonnası köründi.
Şaatlarnıñ Qırım.Aqiqatqa bildirgenine köre, maşinalar yollar tar olğan, maşina areketi ise intensiv olğan şeer merkezinde ilk sefer qayd etildi.
Arbiy tehnika şeerge kiriş tarafından areket etti, lâkin baracaq yeri belli degil.
Bundan evel Keriçte Rusiye arbiy tehnikası «Tavrida» yoluna ya da deñiz limanlarına ketirgen esas yollardan kete edi.
Keçken cumaertesi künü Keriç köpründe olğan patlavdan soñ Keriçte artqan yol trafigi sebebinden maşina areketi deñişe bile.
Qırım.Aqiqat bildirgeni kibi, al-azırda Qırımnıñ Rusiye akimiyeti maşina ve yük maşinalarını limanğa nevbet beklegen yerlerge yollamağa tırışa.
