Qurtarıcılar, "Keriç" qalesiniñ minalardan temizlenmesi yekünlengeni aqqında esabat berdi, dep bildire Rusiye FVN-niñ Qırım idaresi.
Bildirüvge köre, otrâd, qurtarıcı işlerni aqımdaki yılnıñ iyün ayınıñ ortasından başlap yapa edi. Olarda 25 mütehassıs iştirak etti.
Müessise malümatına köre, "Keriç" qalesinde Ekinci Cian cenkinden qalğan altı biñden ziyade patlayıcı nesnelerni taptılar.
Qırım ve Aqyarda Ekinci Cian Cenkinden soñ topraqta qalğan mermiler ara-sıra tapıla. Yarımadada minasızlaştıruv taqımları çalışa.
"Keriç" qalesi (Totleben) - XIX asırnıñ qale inşaatı abidesi, o, Keriç ve Qırımnıñ tanılğan yerlerinden birisidir. Qalege ekskursiyalar keçireler. Kimer yerastı odalar alâ daa tolusınen tetqiq etilmegen. Ekinci Cian cenki vaqtında anda arbiy garnizon ve silâ ile patlayıcılarnıñ anbarı edi.
