21 insan qurban olğan Keriç politehnik kollecindeki patlav ve atışuvdan soñ talebelerniñ dersleri salı künü başladı. Bu aqta Rusiye haber agentlikleri Rusiye nezaretindeki Qırım tasil nazirliginiñ matbuat hızmetine esaslanıp bildire.
TASS malümatına köre, kollecdeki sınıflarda dersler keçirile, talebelerge ilerideki oquv tertibi aqqında tarif etecekler. Dersler 8:30-da başladı.
Tünevin Keriç kolleciniñ talebeleri salı künü, oktâbrniñ 23-nde, derslerge kelecek, dep haber etilgen edi.
Rusiye maarif naziriniñ muavini İrina Potehina bildirdi ki, kollec programmasında ameliy derslerniñ keçirilmesi bar, şu sebepten olarnı Keriç müessiseleriniñ meydanlarına avuştırma meselesi baqıla.
Patlav ve atışuv çarşenbe künü, oktâbrniñ 17-nde, Keriç politehnik köllecinde oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Rusiye ve ilhaq etken Qırım hastahanelerinde Keriçteki ücümde yaralanğan 46 insan buluna, üçü ağır alda. Qırım hastahanelerinde Keriçte yaralanğan 14 genç ve 11 büyük qala. Olarnıñ alı orta ağır dep sayıla.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
