Oktâbrniñ 17-nde kütleviy öldürüv olğan Keriç politehnik kolleciniñ talebe ve ocaları binağa mayın qoyma telükesi sebebinden tahliye etile.
Yerli kütleviy haber vastalarınıñ malümatına köre, al-azırda kollec binasına qurtarıcılar ve Rusiye politsiyası keldi.
Qırımdaki Rusiye Fevqulâde vaziyetler hızmeti ve Qırımdaki Rusiye iç işler nazirliginiñ idareleri resmiy saytlarında Keriç aqqında bir malümat yoq.
«Tışarıda bala ve ocalar tura. Bir çoqu evge ketti. Patlav olğan korpus yanında politsiya, Yol areketi devlet inspektsiyası ve Fevqulâde vaziyetler hızmetiniñ hadimleri çalışa. İlk yardım maşinaları yoq», – dep bildire «Kerç FM» saytı.
Matbuat vastası adise yerinden fotoresimlerni derc ete ve politehnik kollecinde telâş aqqında haberlerni paylaşa.
«Kerç moy gorod» haber saytı yazğanına köre, talebelerniñ aytqanına köre, kollec binasında «telâş dögmesi çalıştı». Voykov, 5 adresindeki korpustan talebelerni çıqarıp, evge kete bileler, dep haber etildi.
Qırım.Aqiqat tafsilâtlı malümat almağa tırışa.
Oktâbrniñ 17-nde, çarşenbe künü, Keriç politehnik kollecinde patlav ve atışuv oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Rusiye işğal etken Qırım akimiyeti bildirnenine köre, Keriç politehnik kollecinde yaralanğan er keske ivaz berildi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
