Keriç parom keçiti “Qırım” limanı - “Kavkaz” limanı yolunen areketni devam etti.
Bu aqta “Qırım deñiz limanları” müessiseniñ baş müdiri Aleksey Volkov öz Facebook saifesinde yazdı.
“Başta maşnalarnıñ deñizden keçmesini “Nina Malkova” paromı becerecek. İleride ise, keçecek yük ve maşnalarnıñ sayısı artqanınen, “Kerçenskiy-2” paromı işini başlaycaq”, - yazdı Volkov.
Onıñ aytqanına köre, paromnıñ esas qullanıcıları Qırım ve Krasnodar vilâyetiniñ sakinleri, “Kavkaz” limanında yerleşken teşkilâtlarnıñ işçileri ve arbiyler olacaq.
Mayısnıñ 16-nda rusiyeli memuriyet Keriç boğazı üstünde qurulğan köpürniñ avtoyol qısmı yengil avtomobillerniñ areketi içün açıldı. Köpürniñ demiryol qısmı şimdilik qurulıp bitirilmedi.
Ukraina prezidenti Petro Poroşenko, Rusiye ilhaq etken Qırımda Keriç köpüriniñ qurğanı Kremlniñ halqara uquqqa sayğısızlıq köstergeniniñ nevbetteki misali olğanı aqqında aytqan edi.
Avropa birligi Rusiye ve ilhaq etilgen Qırım arasında qısmen açılğan Keriç köpürini tenqit etken edi. 2014 senesi Qırım ilhaq etilgen soñ, Ukraina Rusiye ile tizilgen köpür qurulışınen bağlı muqaveleden çıqtı.
