Qurtarıcılar, noyabr 30-ında Keriçteki büyük mebel anbarındabaşlağan yanğınnı söndürdi dep bildire Qırımda rusiye FVN idaresiniñ matbuat hızmeti.
“Yanğıncılarnıñ areketleri neticesinde saat 14:28 368 metr kvadrat mıntaqada açıq yanğın söndürildi. Yanğın sebeplerini ekspertler bilmege tırışa. Zaralanğan ve yaralanğanlar yoq”, - bildirile beyanatta.
Müessiseniñ malümatına köre, yanğıncılar kelgen vaqıtta, binalarda adam olmadı.
Keriçniñ merkezinde cuma künü, noyabrniñ 30-nda, Kokorin soqağındaki anbar binaları yanmağa başladı. Yerli habercilerniñ malümatına köre, politsiya adise yerini sarıp aldı, yanğınnı söndürmege tırışalar.
Bundan evel Bağçasaray rayonınıñ Bazarçıq (Poçtovoye) qasabasında meskün ev yanğan edi. Qurtarıcılarnıñ malümatına köre, noyabrniñ 24-nde yanğından 22 insan qurtarıldı.
