Keriç politehnik kollecinde olğan patlav ve atışuv neticesinde yaralanğan qırq yedi insan Qırım ve Rusiye regionlarındaki hastahanelerinde tedaviylene. Bu raqamnı salı künü, oktâbrniñ 23-nde, Qırımnıñ Rusiye ükümetiniñ yolbaşçısı Sergey Aksenov seslendirdi.
«Bugün 47 insan hastahanelerde qala. Şükür, kritik noqtanı keçtik, dep laf ettik. Başqa ğayıplarımız olmamaq kerek», – dedi Aksenov Keriçte jurnalistlerge.
Onıñ aytqanına köre, yaralanğan bazı insanlar saqat qalacaq.
Aksenov, 22 qoranta balalarını oktâbrniñ 17-nde kütleviy öldürüv olğan Keriç politehnik kollecinden başqa oquv yurtuna avuştırmağa qarar alğanını bildirgen edi.
Onıñ aytqanına köre, Qırım müessiseleriniñ aman-aman 80%-ı, şu cümleden mektep ve bala bağçaları, telükesizlik talaplarına uymay.
Patlav ve atışuv çarşenbe künü, oktâbrniñ 17-nde, Keriç politehnik köllecinde oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Rusiye ve ilhaq etken Qırım hastahanelerinde Keriçteki ücümde yaralanğan 46 insan buluna, üçü ağır alda. Qırım hastahanelerinde Keriçte yaralanğan 14 genç ve 11 büyük qala. Olarnıñ alı orta ağır dep sayıla.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
