Qırım ve Krasnodar ülkesi ve Moskva hastahanelerinde Keriç politehnik kollecinde olğan patlav ve atışuv vaqtında yaralanğan 15 kişi tedaviylenmege devam ete. Bu malümatnı Qırımnıñ Rusiye sağlıq nazirliginiñ yolbaşçısı Aleksandr Golenko aydınlattı, dep bildire TASS Rusiye haber agentligi.
«Bugünki künde 15 insan tedaviylenmekte», – dedi o.
Golenkonıñ aytqanına köre, yaralanğanlardan tek eki kişi Qırım hastahanelerinde buluna. Qalğanları qomşu Rusiyeniñ hastahanelerinde qala.
Qırımnıñ Rusiye sağlıq nazirliginiñ saytında yaralanğanlarnıñ sağlıq vaziyetleri aqqında bir malümat yoq.
Oktâbrniñ 17-nde, çarşenbe künü, Keriç politehnik kollecinde patlav ve atışuv oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
