Keriç köprüniñ kirişinde devlet avtoinspektsiyasınıñ hadimleri Rostov-na-Donuğa Aqmescitteki «Hizb ut-Tahrir davasınıñ» mahkeme oturışuvına ketken qırımlı Enver Ömerovnı tutıp aldı. Bu aqta qırımlı advokat Mammet Mambetov Facebookta haber etti.
«Bugün gece Qırım köprüniñ kirişinde yol hızmeti hadimleri Rostov-na-Donuğa taraflarnıñ munaqaşaları olacaq Aqmescitteki HT gruppası mabüsleriniñ soy-sopları ketken maşinanı toqtattı. Üç saat sebepsiz tutulğan soñ kerekli vesiqalar tizilmedi, Fatma İsmailovanıñ babası Enver Ömerov tutuldı ve Keriç şeeriniñ politsiya bölügine alıp ketirile», – dep yazdı Mambetov.
Onıñ aytqanına köre, Enver Ömerov «yaramadı, acele yardım çağırıldı».
«Kelgen ekimler ine yapıp, qan basımı yüksek olğanı içün onı raatsızlamamağa rica etti. Faqat yol hızmetiniñ hadimleri oña özüne kelmege bermeyip, politsiya bölügine alıp ketkenler», – dep aytıla haberde.
Daa soñra Mambetov Keriçniñ Rusiye politsiyası bölügine kelgen Enver Ömerovnıñ qızı babasını anda tapmadı, dep bildirdi.
Qırım.Aqiqat tafsilâtlı malümat almağa tırışa. Rusiye quvetçileri tutuv ve tintüvler aqqında resmiy şekilde haber etmey.
İyünniñ 10-nda saba Rusiye quvetçileri Enver Ömerov (Qarasuvbazar, Şevçenko, 45/1) ve oğlu Riza Ömerovnıñ (Qarasuvbazar, Mayakovskogo, 9) evinde tintüv keçire. Riza Ömerov tutuldı.
İşğalden soñ Qırımda mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkerilip başlandı.
