Keriç faciasında yaralanğan beş kişi daa Qırım hastahanelerinden çıqarıldı, 16 insan tedaviylenmege devam ete. Bunı çarşenbe künü saba TASS Qırımnıñ Rusiye sağlıq nazirliginiñ malümatına esaslanıp bildire.
Sağlıq nazirliginiñ malümatına köre, dört insannıñ alı orta ağır dep sayıla, 12 kişiniñ alı ise bir qarar.
Al-azırda yaralanğanlarnıñ Krasnodar hastahanelerinden Keriç hastahanesine avuştırma meselesi baqıla.
Daa evel Qırım hastahanelerinde 21 yaralanğan kişi qala, dep haber etilgen edi.
Oktâbrniñ 17-nde, çarşenbe künü, Keriç politehnik kollecinde patlav ve atışuv oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
