Oktâbrniñ 17-nde Keriç politehnik kollecinde olğan faciadan soñ hastahaneden tek bir yaralı çıqarıldı, qalğan 46 kişi tibbiy müessiselerde qala.
Bunı Rusiye haber agentlikleri Qırımnıñ Rusiye Sağlıq nazirliginiñ matbuat hızmetine esaslanıp bildire.
Umumen Rusiye ve işğal etilgen Qırım hastahanelerinde 46 insan buluna, Moskvada – 12 kişi, altısı bala, Krasnodarda – 10 insan, beşi bala, dep haber ete TASS.
Qalğan 24 insan Qırımda qala, birisi bugün Keriç hastahaneden yiberildi.
Keriç politehnik kolleciniñ talebesi stress sebebinden psihiatrik hastahanege alındı.
Oktâbrniñ 17-nde, çarşenbe künü, Keriç politehnik kollecinde patlav ve atışuv oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
