Keriç boğazınıñ kirişinde Qırım yalısında eki yük gemisi yanğınğa oğradı, dep bildire Qırımnıñ Rusiye ükümetine yaqın «Krıminform» saytı «Krımskiye morskiye portı» şirketiniñ müdiri Aleksey Volkovnıñ malümatına esaslanıp.
«Boğazda bir şey yoq, gemiler yüre. Adise 12 millik alannıñ tışında oldı. Qurtaruv hızmeti çağırıldı», – dep tekrarlay Volkovnıñ aytqanlarını neşir.
TASS Rusiye agentligi Rosmorreçflot matbuat hızmetiniñ malümatına köre bildire ki, yanğın Keriç burnundaki bir ya da eki gemide çıqtı. Qurtarıcılar alğan malümatqa köre, gemide olğan insanlar suvğa atlay. Adise yerine deñiz buksiri yollanıldı, gemide 17 ve 14 insan buluna.
