Keriçte Rusiye federal maqsat programmasınıñ «Milletlerara birlik» yönelişinde qurulğan sürgün etilgen vatandaşlar içün yañı ev alâ daa boş tura. Bu aqta Qırımnıñ Rusiye milletlerara munasebetler ve sürgün etilgen vatandaşlarnıñ işleri devlet komitetiniñ yolbaşçısı Albert Kangiyev iş toplaşuvında bildirdi.
Onıñ aytqanına köre, sakinler bu yıl dekabr ayında yerleşip olur.
«Gaz, suv ve elektrik ağlarına bağlanuv meseleleri al etildi. Bundan ğayrı, şunı qayd etmege isteyim ki, teşkerüv vaqtında olğan bütün ihtarlar tüzetildi. Böylece, bugünki künde mesüliyetli kişiler reabilitatsiya olğan ve Keriç şeerinde daire nevbetinde turğan Qırım halqlarından vatandaşlarnıñ bu sene mesken almasına mania olmağanını tasdıqladı», – dep bildire Kangiyevniñ aytqanlarını müessiseniñ matbuat hızmeti.
Qırım.Aqiqat mühbiriniñ malümatına köre, yerleşüv müddeti bir qaç kere deñiştirilgen edi. Ev martnıñ 20-ne qadar teslim etilecek edi. Keriçte nevbette turğanlar yerli ve Qırım akimiyetine şikâyet etken edi.
72 dairelik ev Keriçniñ merkeziy rayonında avtovokzal yaqınlarında qurulğan edi. Qurucılıq tenderini Rusiyeniñ Krasnodar şeerinden «Stroy International» şirketi qazandı, o, tenderge ariza bergen yekâne şirket oldı. Ev qurucılığını 2018 senesi dekabr ayında bitirmege planlaştırıla edi.
