Kellogg qayd etkenine köre, Moskva Lugansk regionını bütünley kontrol ete, Donetsk, Zaporijjâ ve Herson vilâyetleriniñ bir qısmı kontroli altında qala. Aynı vaqıtta, generalnıñ aytqanına köre, kontrol ve uquqiy status arasındaki farqnı añlamaq kerek.
«Biz de-fakto ve de-yüre añlamlarını ayırmaq kerekmiz. De-fakto topraqnı fizikiy ceetten işğal ettiler ve andan çıqmaycaqlarını añlata. Amma de-yüre onı bütünley ilhaq ettiler, dep aytmaq mümkün degil. Halqara toplulıq bu topraqnı Rusiyeniñ bir qısmı olaraq tanımay. Bu qıyın munaqaşalar daa ögde», – dedi Kellogg.
Mahsus vekil Rusiye ve Ukrayina arasında cenkte siyasiy qararğa irişilmesi içün eki tarafnıñ da fikirlerini añlamaq ve uzlaşuv qıdırmaq kerek, eñ azından, Kyiv ve Moskvağa qısmen kelişecek bir uzlaşuv, dep qoştı. Onıñ qayd etkenine köre, iç bir taraf istegen er şeyni alamaz.
Keçken aftanıñ soñunda ABD prezidenti Donald Trumpnıñ mahsus vekili Steven Witkoff Tucker Carlsonğa intervyü berdi. Witkoff Qırım, Donetsk, Lugansk, Herson ve Zaporijjâ vilâyetleriniñ sakinleri «referendumda» Rusiye kontroli altında qalmaq içün rey berdi, dep bildirdi. Onıñ aytqanına köre, topraqlar zaten Rusiyeniñ kontroli altında qala, esas munaqaşa dünya olarnı Rusiye olaraq tanıymı meselesinden ibaret eken.
2022 senesi sentâbr ayında Rusiye Donetsk, Lugansk, Zaporijjâ ve Herson vilâyetleriniñ işğal etilgen topraqlarında referendumlar keçirdi. Olarnı Rusiye ordusı kontrol etti, halqara közetüv olmadı ve bir sıra zorlav ve sahteleştirüv qayd etildi. Halqara toplulıq, şu cümleden BM ve AB, bu «referendumlarnı» qanunsız ve uquqiy ceetten boş dep tanıdı.
2014 senesi Rusiye Qırımda ve Donbasnıñ bir qısmında referendumlar teşkil etken edi. Ukrayina ve halqara toplulıq olarnıñ neticelerini de tanımadılar.
Ukrayina prezidenti ofisiniñ reber muavini Pavlo Palisa bildirgenine köre, Er-Riyaddaki körüşüvde Ukrayina ve Amerika tarafları beraber derc etecek beyanatlarından soñ işke tüşürilecek energetika obyektleri ve Qara deñizde ateş toqtatıluvı aqqında añlaştılar.
Onıñ qayd etkenine köre, topraq uzlaşuvları aqqında bir laf olmadı. Kyiv ateşniñ teñ toqtatılmasını istey – ve añlaşmalar bozulsa, tez cevap bermege azır. Ukrayina ateş toqtatıluvını kontrol etüv mehanizmleri üzerinde ve semereli telükesizlik kefaletlerini almaq içün çalışa, çünki Rusiyege işanç yoq, dep ayttı Palisa.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
