ABD-niñ Ukrayina ve Rusiye meseleleri mahsus elçisi Kit Kellogg fevralniñ 21-nde Ukrayina prezidenti Volodımır Zelenskıy ile "müsbet" muzakereler keçkenini ve "bir sıra meseleler" muzakere etilgenini bildirdi.
Kellog, Ukrayina paytahtına ziyareti vaqtında Zelenskıynıñ "ihtisaslı milliy telükesizlik taqımı" ile muzakereler keçirgenini bildirdi.
Daa evel, Ukrayina prezidenti Volodımır Zelenskıy Kit Kellognen muzakereler keçirip, olarnı "ümütni ğayrıdan tiklegen körüşüv" olaraq adlandırğan edi.
"Bugün çoq halqara işimiz bar edi. General Kellogg — ümüt doğurğan körüşüv, ve bizin Amerika ile küçlü añlaşmalarğa, kerçekten de çalışqan añlaşmalarğa ihtiyacımız bar. İşni tez ve pek yahşı tüşünilgen şekilde yapmaqnı emir ettim. İqtisadiyat ve telükesizlik er vaqıt biri-birine yaqın olmalı ve añlaşma tafsilâtları müimdir: tafsilâtlar ne qadar yahşı yazılsa, neticeler o qadar yahşı olur", — dep ayttı o, video muracaatında.
Onıñ aytqanına köre, Kellog ile cebeni, Rusiyede tutulğan esirlerni azat etüv kerekligini, em de "cenkniñ bir daa qaytmaması ve rusiyeliler ayatlarnı bozmaması içün telükesizlik kefaletleriniñ işançlı ve açıq bir sistemasınıñ kerekligini" muzakere ettiler.
"Barışıq epimizge kerek: Ukrayinağa, Avropağa, Amerikağa, bütün dünyağa", — dep qayd etti Zelenskıy.
Ukrayina prezidenti Volodımır Zelenskıy fevralniñ 20-nde Kıyivde Ukrayina ve Rusiye boyunca ABD mahsus temsilcisi Kit Kellog ile körüşti. Bundan soñ matbuat konferentsiyası keçirilmesi planlaştırılğan edi, amma onı lâğu ettiler.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
