Link açıqlığı

Saatnıñ esas haberi

«Kelecek baarge qadar cedvel boyunca suv» – Qırım matbuatı


Eali ihtiyaçları içün sun toldurıla, 2020 senesi sentâbrniñ 8-i
Eali ihtiyaçları içün sun toldurıla, 2020 senesi sentâbrniñ 8-i

Qırım gazetaları yarımadanıñ suv teminlevi, koronavirus yuqunçı ve Kezlevdeki adise aqqında yaza

Qırım gazetaları yarımadanıñ suv teminlevi, koronavirus yuqunçı ve Kezlevdeki adise aqqında yaza.

«Krımskaya pravda» «Alışmaqtan başqa çare yoq» maqalesinde yarımadada suv qıtlığı şaraitlerinde yaşayış aqqında tarif ete. Gazetanıñ qayd etkenine köre, Aqmescitte ve yaqın köylerde suv, büyük ihtimalnen, kelecek baargece cedvel boyunca berilecek. Aqmescitni ve oña yaqın rayonlarnı suvnen temin etmek içün Qırımda quyulardan suv köterilüvini 70 biñ metr kubqa qadar arttırmaq kerek. Rusiye kontrolindeki Qırımnıñ Nazirler şurasınıñ reisi Yuriy Gotsanükniñ aytqanına köre, bu vaziyette tek bir çezim ola bile: yañı yerastı suvlarnı qıdırmağa devam etmek.

Bu qıdıruvlarğa alimlerni celp eteler. Qırımlı tedqiqatçılar, mahsus gidrotehnik vastalar yardımınen özenlerniñ ust aqımlarını eski çoqraqlarğa qaytarıp, teren suv ufuqlarını toldurmağa teklif ete. Muvaffaq olsalar, Qırım 30 mln-dan 100 mln metr kubqa qadar suv qazana bile.

«Krımskiye izvestiya» koronavirus yuqunçı şaraitlerinde oquv yılınıñ hususiyetleri aqqında ikâye ete. «Çoq beklengen yañı oquv yılı zıddiyetlerden başlandı. Ana-babalarnı raatsızlağan uzaqtan tasil qasevetleri qaldı – başqa qasevetler keldi. Birileri çoq insan bir yerde olacağından qorqa (amma qaçınılması mümkünmi?), digerleri saçma dey. Mekteplerde kirsetilgen sert sanitar qaideleri şaşırttı. Sentâbrniñ birinde bile quvanç duyğuları yoq oldı. Ana-babalar tedbirge alınmadı. Episi qora tübünde toplaştı, burun-burunğa, ebet, maskalar yoq», – dep yaza neşir.

Gazetanıñ qayd etkenine köre, mektepler yapa bilgeni qadar yañı kerçeklerge alışa. «Kündüz oqumaq içün bir şeyni feda etmek kerek. Amma kerekmi? Saba sıcaq teşkerilgende tek nevbetler ola, amma suvuqlanğan balalar ayırılmay. Burnu aqqan ve öksürgen soyları endi bar. Ocalar er şeyni yetiştirmek içün sınıftan-sınıfqa çapqalay. Ne qadar dayanırlar? Ana-babalar er şeyge razı, amma uzaqtan tasil olmasın».

«Komsomolskaya pravda. Krım» Kezlev civarındaki adise aqqında tarif ete, anda kurort mülkiniñ saiplerini öz evlerine kirsetmeyler. Gazetanıñ malümatına köre, Vitino qasabasında Qırım ve Rusiye sakinleri «Marina Roza» raatlıq bazasında yalı boyu mülkini aldı. Bütün belâlarnıñ sebebi – şirket açıp, Moloçnenskiy köy şurasından topraqnı 49 yılğa kiralağan iş adamıdır. Topraq damartısınıñ kadastr kodu bar – turistik hızmet. İş adamı paydaşlıq qurucılıq añlaşmalarına köre evlerni qurdı. Mülkni satıp, iş adamı yañı saiplerinden kommunal hızmetlerni bir yıl ögüne ödemelerini talap etti, aks alda suv ve elektrikni keser dedi.

Baza reberligi ile olğan qavğalardan eñ faal sakinler evlerine kirip olamay. İnsanlar qanun tuzağına oğradı: vesiqalarğa köre, evler olarğa ait, amma topraq – belediye ve kiracığa.

XS
SM
MD
LG