Çoqbalalı ve azteminatlı qorantalardan başlanğış mektep talebelerine quru aş paylarınıñ berilmesi kelecek aftadan başlanacaq. Bunı Qırım.Aqiqat mühbiri bildirdi.
Onıñ malümatına köre, ana-babalar çatlarında quru aş payınıñ alınması içün kim ve ne vaqıt ariza yazmalı olğanı aqqında malümat tarqatıla. Talimatqa ariza nümünesi de qoşulğan.
"Arizanı bastırıp toldurmaq kerek, soñra suretini çekip 8.04.2020 tarihınace sınıf reberine yollamaq. Quru aş paylarını 15.04.2020 tarihından soñ tarqatıp başlaycaqlar. Arizanıñ aslını ve pasportnı aş paylarını almağa kelgende ketirirsiñiz", - denile beyanatta.
Daa evel Rusiye nezaretindeki Qırım Tasil, İlim ve Gençlik Nazirligi talebelerniñ quru aşlarnen temin etmesini teşkil etilmesi aqqında haber etti.
Beyanatta bildirilgeni kibi, quru aşlar, 1-4 sınıf talebeleri olğan öksüzsiz balalarğa, ana-babasız qalğan balalarğa, sıñırlanğan sağlıq imkânları olğan balalarğa, çoqbalalı ve azteminatlı qorantalardan olğan balalarğa berilecek.
