Ukrainanıñ Rostov-na-Donu baş konsulı vazifelerini eda etken Taras Malışevskiyniñ bildirgenine köre, qomşu Rusiyeniñ SİZOlarında tutulğan qırımlı siyasiy mabüsler kelecek afta maddiy yardım alacaq. Bu aqta o, «Qırım birdemligi» cemaat birleşmesine bildirdi.
«Qorantalarğa ziyaretlerim aqqında malümat berildi. Er kesniñ maddiy yardım arizaları alındı, biraz olsa da, er kesniñ şahsiy esabına para yardımı kelecek», – dep qayd etti Malışevskiy.
Hatırlatamız, Malışevskiy aprelniñ 14, 15 ve 17-nde bu şeerniñ penitentsiar müessiselerinde tutulğan 16 qırımlı siyasiy mabüsni ziyaret etti.
Onıñ qayd etkenine köre, Yaltadaki «Hizb ut-Tahrir davasınıñ» beş mabüsinden er birinen, Bağçasaraydaki ekinci «Hizb ut-Tahrir davasınıñ» bütün mabüsleri ve Nariman Memedeminov, Oleg Prıhodko ve Enver Seytosmanovnen ayrı küreşti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
